மறைந்த எழுத்தாளர் வல்லிக்கண்ணன் ஓர் பன்முக ஆளுமை. சிறுகதை, நாவல், கட்டுரை, கவிதை, நாடகம், திரைப்படம், வாழ்க்கை வரலாறு, மொழிபெயர்ப்பு, விமர்சனம் என்று பல தளங்களிலும் இயங்கியவர். எழுத்துக்காகத் தன்னுடைய அரசுப் பணியையே துறந்தவர். 1930-களிலும், 40-களின் தொடக்க ஆண்டுகளிலும் கதைகள், உணர்ச்சிகரமான கட்டுரைகள், பாடல்கள் ஆகியவற்றை ரா.சு.கிருஷ்ணஸ்வாமி என்றும், ராசுகி என்ற பெயர்களிலும் எழுதத் தொடங்கினார். பிறகு, அவரது சொந்த ஊரான ராஜவல்லிபுரத்தில் உள்ள வல்லியையும் ,கிருஷ்ணஸ்வாமி என்ற தன் பெயரிலுள்ள கண்ணனையும் இணைத்து, வல்லிக்கண்ணன் என்ற புனைபெயரைத் தேர்ந்துகொண்டார். ‘புதுக்கவிதையின் தோற்றமும் வளர்ச்சியும்’ என்ற விமர்சன நூலுக்காக 1978-ல் இவருக்கு சாகித்ய அகாடமி விருது கிடைத்தது.