நீலகிரி மாவட்டத்தின் கூடலூர் பகுதி. தேயிலைத் தோட்டங்களும் அடர்ந்த வனங்களும் சூழ்ந்த அந்தப் பகுதியில், ஒரு அதிகாலையில் ஒருவன் கொல்லப்பட்டுக் கிடக்கிறான். அவன் உடல் சிதறிக் கிடப்பதிலிருந்து, புலி அடித்துச் செத்திருக்கலாமென ஊர்க்காரர்கள் நம்பி வனத் துறையில் புகார் செய்கிறார்கள். ஒரு சின்னஞ்சிறிய கிராமத்தைச் சுற்றி நகரத் தொடங்கும் இந்தக் கதை ஒவ்வொரு கட்டமாக விரிந்து மூன்று மாநிலங்களில் இருக்கும் அரசியல்வாதிகள், தொழிலதிபர்கள் அவர்கள் கடைப்பிடிக்கும் வினோதச் சடங்குகள் குறித்தெல்லாம் பேசத் தொடங்குகிறது. நம்பிக்கைகளுக்காகவும் வெற்றிகளுக்காகவும் மனிதன் எத்தனை குரூரமான செயல்களையும் செய்யக்கூடியவனாய் இருக்கிறான் என்பதை எல்லோருக்கும் பொதுவாயிருந்து அத்தனை தீமைகளையும் செய்தவனின் குரலாகப் பேசும் கதை.