திருச்சியிலுள்ள முசிறியில் பிறந்த ராஜம் கிருஷ்ணன், தமிழகப் பெண் முன்னோடி எழுத்தாளர்களில் ஒருவர். சமூக அவலங்களை அம்பலப்படுத்தற்கே தனது படைப்புகளில் முன்னுரிமை கொடுத்தார். பொதுவாக, தனது படைப்புக்காகத் தேர்ந்தெடுக்கும் கதைக்களத்துக்கு நேரில் சென்று, அங்கு வாழும் மக்களோடு நெருங்கிப் பழகி, உண்மை நிலைமைகளை அனுபவபூர்வமாக உணர்ந்து, கள ஆய்வு மேற்கொண்ட பிறகே எழுதுவது அவரது தனிச்சிறப்பு. ராஜம் கிருஷ்ணன் மறைந்து ஐந்து ஆண்டுகளில் அவரது படைப்புகள் நாட்டுடைமை ஆக்கப்பட்டன. ‘வேருக்கு நீர்’ நாவலுக்காகக் கிடைத்த சாகித்ய அகாடமி விருது உட்பட நியூயார்க் ஹெரால்ட் ட்ரைப்யூன் சர்வதேச விருது, கலைமகள் விருது, சோவியத் லாண்ட் நேரு விருது, திரு.வி.க. விருது எனப் பல விருதுகளைப் பெற்றுள்ளார்.