சாவி வார இதழில் 1987 முதல் 1995 பணியாற்றிவிட்டு, பின்பு விகடன் குடும்பத்தில் இணைந்த ரவிபிரகாஷ், ‘சக்தி விகடன்’ இதழின் ஆசிரியராகவும் பதிப்பாசிரியராகவும் பணியாற்றி, கடந்த ஆண்டு ஓய்வு பெற்றார். 1978 முதல் இன்றுவரை, ஏறத்தாழ 200 சிறுகதைகளுக்கு மேல் எழுதியுள்ள இவர், ஏராளமான குறுங்கதைகள், மின்மினிக் கதைகள், விஷுவல்டேஸ்ட் கதைகள், ஏடாகூடக் கதைகள் எனப் பலவும் எழுதியுள்ளார். டிஸ்லெக்ஸியா குறைபாடு பற்றிய இவரின் விழிப்புணர்வு நூல் ‘தரையில் நட்சத்திரங்கள்’ வாசகர்களிடம் பெரும் வரவேற்பைப் பெற்று, பல பள்ளி, கல்லூரி நூலகங்களிலும் இடம்பிடித்துள்ளது. பத்திரிகைத் துறைக்கு வருவதற்கு முன்பு, சென்னை ஆல் இண்டியா ரேடியோ ஒலிபரப்பிய நாடகங்கள் பலவற்றில் கலந்துகொண்டு நடித்திருக்கிறார். விழுப்புரம், மகாத்மா காந்தி உயர்நிலைப் பள்ளியில் படித்தபோது, பேச்சுப் போட்டி, கட்டுரைப் போட்டிகளில் கலந்துகொண்டு, பெருந்தலைவர் காமராஜர் கையால் பரிசு பெற்றிருக்கிறார். 2015-ல் சேக்கிழார் ஆராய்ச்சி மையம் இவருக்கு ‘சிறந்த பத்திரிகையாளர் விருது’ வழங்கிக் கௌரவித்தது. 2017-ல் ஆலந்தூர் ஃபைன் ஆர்ட்ஸ் அமைப்பு இவருக்கு ‘கண்ணதாசன் விருது’ அளித்துப் பெருமைப்படுத்தியுள்ளது.