அமரர் கல்கியின் இயற்பெயர் ரா.கிருஷ்ணமூர்த்தி. மயிலாடுதுறைக்கு அருகேயுள்ள பட்டமங்களம் கிராமத்தில் பிறந்தவர். சிறுகதை, நாவல், கட்டுரை, பயணக் கட்டுரை, வாழ்க்கை வரலாறு என வெவ்வேறு இலக்கிய வகைமைகளில் தடம் பதித்தவர். தன் படைப்புகள் மூலம் இந்திய விடுதலைப் போராட்டத்துக்கும் பங்களித்திருக்கிறார். கல்கி அளவுக்குப் பெரும் வாசகர் திரளைப் பெற்ற தமிழ் எழுத்தாளர்கள் குறைவு. ‘பொன்னியின் செல்வன்’, ‘சிவகாமியின் சபதம்’, ‘பார்த்திபன் கனவு’ என அவருடைய புகழ்பெற்ற சரித்திர நாவல்களோடு, பிற சமூக நாவல்களும் கதைகளும் இன்றுவரை லட்சக்கணக்கான வாசகர்களைத் தன் வசம் ஈர்த்துவருகின்றன.