விருதுநகர் மாவட்டத்திலுள்ள நரிக்குடி எனும் சிற்றூரில் பிறந்தவர் நா.பார்த்தசாரதி. ‘கல்கி’ இதழிலிருந்து விலகி, ‘தீபம்’ இலக்கிய இதழைத் தொடங்கியது என்பது அவருடைய அடையாளங்களுள் ஒன்றாக மாறிப்போனது. சமூகப் பிரச்சினைகளைத் தீர்க்கப் போராடும் கொள்கைப் பிடிப்புள்ள கதைமாந்தர்களையே தன் நாவல்களில் உலவவிட்டார். இவருடைய புகழ்பெற்ற நெடுங்கதைகளான ‘குறிஞ்சி மலர்’, ‘பொன் விலங்கு’ இரண்டும் தொலைக்காட்சித் தொடர்களாகவும் வெளிவந்தன. இவரது ‘சமுதாய வீதி’ நாவலுக்காக 1971-ல் சாகித்ய அகாடமி விருது கிடைத்தது. தனது 55-வது வயதில், ‘பழந்தமிழர் கட்டடக் கலையும் நகரமைப்பும்’ என்னும் தலைப்பில் முனைவர் பட்டத்துக்காக ஆய்வு செய்தார். பட்டம் வாங்குவதற்கு முன்பாகவே மறைந்துவிட்டார்.