திருநெல்வேலியில் பிறந்த கலாப்ரியா, இந்தியன் ஓவர்சீஸ் வங்கியில் பணிபுரிந்து ஓய்வு பெற்றவர். 1968-ல் கவிதைகள் எழுதத் தொடங்கிய இவர், சுமார் ஐம்பது ஆண்டுகளாக 22 கவிதைத் தொகுப்புகள், இலக்கியக் கட்டுரைகள் , தன்வரலாற்றுப் புனைவு, தமிழ் சினிமா வரலாறு என 11 கட்டுரை நூல்கள், மூன்று நாவல்கள், ஒரு சிறுகதைத் தொகுப்பு என நாற்பது நூல்கள் எழுதியிருக்கிறார். இவரது பங்களிப்பாக சுமார் 1,500 கவிதைகளைத் தமிழ் மொழிக்கு வழங்கியுள்ளார். இவரது கவிதைகள் ஆங்கிலம், பிரெஞ்சு, இந்தி, தெலுங்கு, மலையாளம், வங்காளம், ஒரியா போன்ற மொழிகளில் மொழிபெயர்க்கப்பட்டுள்ளன. இவரது கவிதைகளை ஆய்வுசெய்து பலர் முனைவர், இளம் முனைவர் பட்டங்கள் பெற்றுள்ளனர். ‘பதிவுகள்’ என்ற இலக்கிய அமைப்பு தொடங்கி, 1987 முதல் குற்றாலத்தில் எட்டு கவிதைப் பட்டறைகள் நடத்தியுள்ளார். நவீனக் கவிதையில் க.நா.சு. எழுதிய தன்வரலாற்று நீள் கவிதைக் குறுங்காவியத்திற்குப் பிறகு, இவர் எழுதிய ‘சுயம்வரம்’, ‘ஞானபீடம்’, ‘எட்டயபுரம்’ போன்ற குறுங்காவியங்கள் பெரிதும் பேசப்பட்டவை.