நவீனத் தமிழ் இலக்கியத்தில் மிகப் பரந்த வாசகர் பரப்பைக் கொண்ட சொற்பமான எழுத்தாளர்களுள் ஒருவர் சாரு நிவேதிதா. இவரது புகழ்பெற்ற நாவல்களுள் ஒன்றான ‘ஸீரோ டிகிரி’, சுவிட்சர்லாந்தின் யான் மிகால்ஸ்கி இலக்கிய விருதுக்கு 2013-ல் பரிந்துரைக்கப்பட்டது. ‘எக்கனாமிக் டைம்ஸ்’ நாளிதழ், 2001 - 2010 தசாப்தத்தினுடைய இந்தியாவின் முதன்மைப் பத்து மனிதர்களில் ஒருவராகவும், ‘தி இந்து’ 2014 தீபாவளி மலரில் தமிழக மனதில் பதிந்த முகங்களில் ஒருவராகவும் இவரைத் தேர்ந்தெடுத்தன. இவருடைய கட்டுரைகளும் பத்திகளும் மலையாள வாசகர்களிடம் பெரும் வரவேற்பு பெற்றுள்ளன. உலக அளவிலும் இவரது எழுத்துக்கு வாசகர்கள் உண்டு. ‘எக்ஸைல்’, ‘ஸீரோ டிகிரி’, ‘ராஸ லீலா’ ஆகிய நாவல்களும், ‘கோணல் பக்கங்கள்’, ‘தப்புத் தாளங்கள்’, ‘மனம்கொத்திப் பறவை’, ‘வேற்றுலகவாசியின் டயரிக் குறிப்புகள்’ ஆகிய கட்டுரைத் தொகுப்புகளும் இவரது படைப்புகளுள் முக்கியமானவை.