தமிழ் நவீன இலக்கியத்தின் முன்னோடி ஆளுமைகளுள் ஒருவரான லால்குடி சப்தரிஷி ராமாமிருதம், திருச்சி மாவட்டத்திலுள்ள லால்குடியில் பிறந்தவர். முதல் சிறுகதை எழுதியபோது அவருடைய வயது 17. நூற்றுக்கும் மேற்பட்ட சிறுகதைகளையும், ஆறு நாவல்களையும் எழுதியிருக்கிறார். வாழ்க்கை அனுபவக் கட்டுரைகள் இரண்டு தொகுப்புகளாக வெளிவந்திருக்கின்றன. தன்வரலாற்று நூலான ‘சிந்தா நதி’க்காக 1989-ல் சாகித்ய அகாடமி விருது கிடைத்தது. அவர் வங்கி அதிகாரியாக நீண்ட காலம் பணியாற்றினார். சென்னையில் காலமானார். ‘பச்சைக் கனவு’, ‘ஜனனி’, ‘உத்தராயணம்’ ஆகிய சிறுகதைத் தொகுப்புகளும், ‘புத்ர’, ‘அபிதா’ ஆகிய நாவல்களும் லா.ச.ரா.வின் புகழ்பெற்ற படைப்புகள்.