திருநெல்வேலியிலுள்ள பாளையங்கோட்டையில் பிறந்த ஆண்டாள் பிரியதர்ஷிணி, தற்போது சென்னையில் வசித்துவருகிறார். ஆங்கில இலக்கியம் பயின்றவர். அண்ணா பல்கலைக்கழகத்தின் தங்கப் பதக்க மாணவி. 1981-ல் கல்லூரிக் காலத்திலிருந்தே இவரது எழுத்துப் பயணம் தொடங்கிவிட்டது. கவிதை, சிறுகதை, நாவல், கட்டுரை, மொழிபெயர்ப்பு என எல்லா வகைமைகளிலும் செயல்பட்டுவரும் இவர், எழுத்துப் பணிக்காக இருபதுக்கும் மேற்பட்ட விருதுகளை வென்றிருக்கிறார். சமூகத்தின் அடிமட்டத்தில் வாழும், புனைவாசிரியர்களின் பார்வைக்கு அதிகமும் பட்டிராத மனிதர்களின் வாழ்க்கையை எழுதுவது இவருடைய தனித்துவமாகும்.