இளங்கோ, ஸ்கிஸாய்ட் பர்ஸனாலிட்டி (Schizoid Personality) எனப்படும் மனப் பிளவு உளவியல் கூறு கொண்டவன். விளம்பரப் பலகைகள், பேனர்கள் எழுதும் தொழிற்துறை ஓவியன். 2000 வருட வாக்கில் ப்ளக்ஸ் பேனர்கள், போர்டுகள் வரவால் தொழிற்துறை ஓவியத் தொழில் பாதிக்கபட்டு, தொழில் இழக்கிறான். எட்டாம் வகுப்பு படிக்கும்போதிலிருந்து அவனைக் காதலித்து வந்தவளான எம்.ஃபில். மாணவி மாதங்கி, இளங்கோ வீட்டிலும் நன்கு பழகி, அவர்கள் திருமணத்துக்கு சம்மதித்தும், அவளை மிக விரும்பியும் இருந்த நிலையில், தன் அம்மாவின் கட்டாயத்தால் வேறு ஒருவரைத் திருமணம் செய்துகொள்கிறாள். தன் மகன் காதல் தோல்வியால் பாதிக்கப்படக் கூடாது என்பதற்காக, இளங்கோவின் தந்தை, மாதங்கியின் திருமணத்துக்கு முன்பே அவனுக்கு சாமுத்ரிகாவைத் திருமணம் செய்து வைக்கிறார். முன்னாள் காதலியின் நினைவிலிருந்து மீள முடியாமல், குடி போதையிலும் ஆழ்ந்துவிடுகிற இளங்கோ, ஆறேழு மாதங்களாகியும் மனைவியுடன் தாம்பத்தியத்தில் ஈடுபடாமல் அவளிடமிருந்து விலகியே இருக்கிறான். பிறகு என்ன ஆயிற்று என்பதுதான் இந்த நாவலின் கதை.