சிவகங்கை மாவட்டத்திலுள்ள சிவலாங்குடி கிராமத்தில் 1975-ல் பிறந்தவர் கா.சிவா எனும் கா.சிவசுப்பிரமணியன். விவசாயம் நலிந்ததாலும், தந்தை தெற்கு ரயில்வேயில் பணிபுரிந்ததாலும் இவரது பன்னிரண்டாவது வயதில் சென்னைக்கு குடிபெயர்ந்தார்கள். பெற்றோர், மனைவி அங்கம்மாள், பிள்ளைகள் கார்த்திகேயன், திவ்ய பாரதியுடன் தற்போது ஆவடியில் வசித்துவரும் இவர், தமிழக அரசுப் பணியாளர் ஆவார். ‘பதாகை’, ‘சொல்வனம்’, ‘யாவரும்’, ‘வாசகசாலை’ ஆகிய இணைய இதழ்களிலும் ‘கணையாழி’, ‘புரவி’ ஆகிய அச்சு இதழ்களிலும் இவரது கதைகள் வெளியாகியுள்ளன. இவரது முதல் சிறுகதைத் தொகுப்பு ‘விரிசல்’ 2020-ல் வெளியானது. இரண்டாவது சிறுகதைத் தொகுப்பு ‘மீச்சிறுதுளி’ விரைவில் வெளிவரவுள்ளது.