அறிஞர் அண்ணா என்று அழைக்கப்படும் கா.ந.அண்ணாதுரை, நடுத்தர வர்க்க நெசவாளக் குடும்பத்தில் பிறந்தவர். தன் ஆரம்பகால வாழ்க்கையைப் பள்ளி ஆசிரியராகத் தொடங்கியவர். தமிழிலும் ஆங்கிலத்திலும் சிறப்பாகச் சொற்பொழிவாற்றவும் எழுதவும் வல்லவர். இவர் பல முற்போக்கு, சீர்திருத்த நாடகங்களையும் எழுதியிருக்கிறார். அவற்றுள் சிலவற்றை இயக்கியிருக்கிறார்; சிலவற்றுள் நடித்திருக்கிறார். தமிழ்த் திரைப்படங்களுக்கு கதை, வசனம் எழுதி, தன்னுடைய திராவிட சீர்திருத்தக் கருத்துகளை அதன்மூலம் பரப்பியவர் இவர். தமிழகத்தின் ஆறாவது முதலமைச்சர். இந்தியா குடியரசான பிறகு, ஆட்சி அமைத்த காங்கிரஸ் அல்லாத முதலாவது திராவிடக் கட்சித் தலைவரும், அறுதிப் பெரும்பான்மையுடன் ஆட்சி அமைத்தவரும் ஆவார்.