ஜூலை 27, 1921-ல் பிறந்த சரோஜா ராமமூர்த்தி, காந்தியத்தில் ஈடுபாடு கொண்டவர். சுதந்திரப் போராட்டத்தில் கலந்துகொண்டவர். காங்கிரஸ் நடத்திய போராட்டங்களில் ஈடுபட்டு சிறைசென்றவர். இவருடைய கணவரும் அப்படித்தான். இருவரும் காந்தியின் வார்தா ஆசிரமத்தில் இருந்திருக்கிறார்கள். சுதந்திரத்துக்குப் பின் கிராம நிர்மாணப் பணிகளில் ஈடுபட்டார்கள். இவருடைய குடும்பமே எழுத்தாளர் குடும்பம். கணவர் து.ராமமூர்த்தியும், மகன்கள் ரவீந்திரனும் ஜெயபாரதியும் எழுத்தாளர்கள். சரோஜா ராமமூர்த்தியின் கதைகள் இந்திய சுதந்திரப் போராட்ட கால மனநிலைகளைக் காட்டுபவை. மரபை அதன் விழுமியங்களை மீறாமல் சீர்திருத்தும் நோக்கம் கொண்டவை. சமூக விடுதலையையும் தனிமனிதனின் அகவிடுதலையையும் பற்றிய காந்தியப் பார்வையை முன்வைப்பவை. 1991-ல் காலமானார்.