கந்தசாமி குடும்பத்தினருக்கு என்ன தீங்கு செய்ய மாசிலாமணி நினைத்தாரோ, அதே தீங்கை ரமாமணியின் குடும்பத்தினர்க்குச் செய்துவிடுகிறார்கள். அதை அறிந்த நீலலோசனியம்மாள், அவர்களுக்கு ஆறுதல் சொல்ல மருத்துவமனைக்கு வந்து, தன் பணத்தை அவர்களுக்குக் கொடுக்கும் பொருட்டு பத்திரம் ஒன்றைப் பதிவு செய்கிறார். அதே வேளை, இடும்பன் சேர்வைகாரனைத் தப்பிக்க வைக்க தான் இங்கிருப்பது சரியில்லை என்று சொல்லி, மாசிலாமணி வீட்டுக்குச் செல்ல ரமாமணியிடம் கடிதம் வாங்கிக்கொண்டு செல்கிறார். பட்டாபிராம பிள்ளை வீட்டில் வேலாயுதம் பிள்ளை தன் மகன் திரும்ப வர வேண்டி விரதம் இருந்து பூஜை நடத்துகிறார். வேலாயுதம் பிள்ளையின் குடும்பத்தினர் அன்பிலும், அவர்களின் நடத்தையாலும் மனோன்மணி தன்னை மாற்றிக் கொள்கிறாள். கந்தசாமி எப்போது வருவான் என்று காதலோடு ஏங்கியபடி காத்திருக்கிறாள். இடும்பன் சேர்வைக்காரனோடு சிறையில் இருக்கும் சாயப்பு மூலம் சட்டநாதப்பிள்ளை இருக்கும் இடம் தெரிந்து, அவரை ஆஜர்படுத்தி கோர்ட்டில் விசாரணை நடக்கிறது. அதற்கு உடந்தையாக இருந்த மாசிலாமணிக்கும் ரமாமணிக்கும் தண்டனை கிடைத்ததா? காணாமல் போன கந்தசாமி திரும்ப வந்து காத்திருக்கும் மனோன்மணியைக் கரம் பிடித்தானா? திகம்பர சாமியார் மீண்டுவந்தாரா? இப்படியான பல்வேறு சம்பவங்களை சுவாரஸ்யமான நடையில் சொல்கிறது இறுதிப் பகுதி.