கொலை பற்றி ஒரு கதை எழுதிய எழுத்தாளன், தான் வழக்கமாகச் செல்லும் ஹோட்டலில் ஒரு உண்மையான கொலைகாரனைச் சந்திக்கிறான். இப்போதுதான் கொலை வழக்கிலிருந்து விடுதலையாகி வந்திருக்கிறான் அவன். குற்றம் நிரூபிக்கப்படவில்லை. அவனுடன் பேசினால் நாவல் எழுதுவதற்கு ஏதேனும் கதை கிடைக்கலாம் என்று நினைக்கிறான் எழுத்தாளன். திரும்பத்திரும்ப காபி பருகியபடியே அவனுடைய கதையைக் கேட்டுத் தெரிந்துகொள்கிறான். தன்னுடைய சுயவரலாறை ஒரு கதைபோல அவன் விவரிக்கும்போது ஒரு குற்றம், அதையொட்டி இன்னொரு குற்றம் என வெவ்வேறு பின்னணியும், வெவ்வேறு நபர்களும் திரண்டு வருகிறார்கள். அவன் சொல்லிய கதைகளில் உலவும் மனிதர்களில் சிலர், இறுதியில் அந்த ஹோட்டலுக்கே வருகிறார்கள். அவர்களுடைய வருகையால் பூரணத்துவம் பெறுகிறது கதை.