குறிப்பிடத்தகுந்த ஈழத் தமிழ்ப் படைப்பாளிகளில் ஒருவரான ஷோபாசக்தியின் இயற்பெயர் அன்ரனிதாசன் யேசுதாசன். இலங்கையின் யாழ்ப்பாணம் பகுதியைச் சேர்ந்த அல்லைப்பிட்டி கிராமத்தில் பிறந்த இவர், தற்போது பிரான்சில் வசிக்கிறார். சிறுகதை, நாவல், விமர்சனம், நாடகம், திரைப்படம், நூல் பதிப்பு என வெவ்வேறு தளங்களில் தீவிரமாக செயல்பட்டுவருகிறார். ‘கொரில்லா’, ‘ம்’, ‘Box கதைப்புத்தகம்’, ‘இச்சா’ ஆகிய நாவல்களும், ‘தேசத்துரோகி’, ‘எம்.ஜி.ஆர். கொலைவழக்கு’, ‘கண்டி வீரன்’, ‘மூமின்’ ஆகிய சிறுகதைத் தொகுப்புகளும் இவரது புனைவாக்கங்கள். இரண்டாயிரத்தின் பிற்பகுதியில் நடிகராகவும் அவதாரமெடுத்தார். இவர் நடித்து வெளிவந்த ‘தீபன்’ என்ற பிரெஞ்சுத் திரைப்படம் 2015-ல் நடைபெற்ற ‘கான்’ திரைப்பட விழாவில் சிறந்த திரைப்படத்துக்கான தங்கப்பனை விருது வென்றது.