மாயூரம் வேதநாயகம் பிள்ளை எழுதிய முதல் நாவலான ‘பிரதாப முதலியார் சரித்திரம்’தான் நவீனத் தமிழ் இலக்கியத்தின் முதல் நாவல் என்றும் மதிப்பிடப்படுகிறது. அந்த நாவல் அவரது காலகட்டத்திலேயே நல்ல வரவேற்பைப் பெற்றது. அந்த வரவேற்பைத் தொடர்ந்து அவர் எழுதிய நாவல்தான் ‘சுகுணசுந்தரி சரித்திரம்’. கதையின் நாயகியான சுகுணசுந்தரியை ஓர் அரசன் கவர்ந்துசெல்கிறான். அப்படிக் கடத்திச்செல்லும்போது பாதி வழியில் ஒரு கன்னிமாடத்தினுள் புகுந்துகொள்கிறாள் நாயகி. அவளைத் தேடும் படலம் தொடங்குகிறது. இதனிடையே, அரசனின் ஆட்சியை ஒரு அமைச்சர் பிடிக்க நினைக்கிறார். இதனால், போராட்டம் வெடிக்கிறது. இதுதான் கதையின் பின்னணி. இந்தப் பின்னணியில் சமூக விழுமியங்களைப் பேசுகிறது நாவல். முதல் நாவலும் விழுமியங்களை அடிப்படையாகக் கொண்டதுதான். அதில் விடுபட்டுப்போன வேறு விழுமியங்களை இந்த நாவலில் கையாள்கிறார்.