சிறுகதை, நாவல், விமர்சனம், ஆய்வு, மொழிபெயர்ப்பு, நாடகம், வாழ்க்கை வரலாறு எனப் பல தளங்களில் இயங்கியவர் தொ.மு.சிதம்பர ரகுநாதன். பத்திரிகை ஆசிரியர். ரகுநாதனின் எழுத்துகள், ஆய்வுகள், விமர்சனங்கள் யாவும் தமிழில் மார்க்சியச் சிந்தனைகளை வளர்த்தன. ‘சாந்தி’ என்ற முற்போக்கு இலக்கிய மாத இதழை நடத்தினார். அவரது இலக்கிய விமர்சன நூலான ‘பாரதி: காலமும் கருத்தும்’ 1983-ல் சாகித்ய அகாதமி விருது பெற்றது. திருச்சிற்றம்பலக் கவிராயர் என்ற புனைபெயரில் கவிதைகள் எழுதியுள்ளார். 4 சிறுகதைத் தொகுப்புகள், 3 கவிதைத் தொகுப்புகள், 3 புதினங்கள், 2 நாடகங்கள் எழுதியுள்ளார். 2001-ல் பாளையங்கோட்டையில் காலமானார்.